Íslenska u-21 árs landsliðið tók á móti Portúgal í undankeppni EM 2023 í dag. Leikið var á Víkingsvelli í Fossvoginum. Leiknum lauk með 1-0 sigri Portúgals.
Íslenska liðið byrjaði betur og hefði í raun geta verið búið að skora eitt til tvö mörk á fyrstu 25 mínútunum en Celton Biai, sem stóð í marki Portúgala átt mögnuð tilþrif í markinu og sá við Íslendingum í nokkur skipti.
Eftir það jöfnuðust leikar aðeins og Jökull Andrésson, markvörður íslenska liðsins náði að koma í veg fyrir mark hjá Portúgal með frábærri markvörslu frá Fabio Silva, leikmanni Wolves.
Það var því markalaust er dómarinn flautaði til hálfleiks.
Fyrsta markið leit dagsins ljós á 55. mínútu, það var Portúgalinn Fabio Vieira sem skoraði það eftir misheppnaða hreinsun Finns Tómasar úr varnarlínu Íslands. Boltinn datt fyrir Vieira sem gerði vel og kom Portúgal yfir.
Ísland fékk gullið tækifæri til þess að jafna leikinn á 62. mínútu þegar Kristall Máni átti sendingu inn fyrir vörn Portúgals á Sævar Atla Magnússon sem hlóð í skot en Eduardo Quaresma, varnarmaður gestana komst í veg fyrir skotið.
Jafnræði var með liðunum eftir þetta án þess þó að annað mark liti dagsins ljós. Leikar enduðu með 1-0 sigri Portúgals. Þrátt fyrir tap mátti sjá mörg jákvæð teikn á lofti í leik íslenska liðsins.
Ísland er eftir leikinn í 4. sæti riðilsins með 4 stig eftir þrjá leiki og fimm stigum á eftir efsta liði riðilsins, Portúgal. Næsti leikur Íslands er gegn Grikklandi á útivelli þann 16. nóvember næstkomandi.