Íslenska u-21 árs karlalandsliðið mætir í dag Portúgal í undankeppni EM 2023. Leikið verður á Víkingsvelli og leikar hefjast klukkan 15:00.

Ísland er í 4. sæti riðilsins með fjögur stig eftir tvo leiki en Portúgal í því þriðja með fullt hús stiga eftir tvo leiki en bæði lið eiga leiki til góða á liðin fyrir ofan sig.

Það er ljóst að íslenska liðið þarf að eiga mjög góðan dag til þess að geta sigrað Portúgal en hefð er fyrir afar sterkum yngri landsliðum í knattspyrnu frá landinu.

Portúgalska landsliðið á enn eftir að fá á sig mark í keppninni og er með markatöluna 12-0.

„Þetta er lið sem er mjög sigursælt í yngri landsliðum, góð hefð fyrir því hjá þeim. Þeir eru með mjög frábæra einstaklinga og hafa byrjað mótið gríðarlega vel,“ sagði Davíð Snorri Jónasson, þjálfari íslenska liðsins í samtali við vísi í gær.

Davíð Snorri segir að auðvitað muni íslenska liðið reyna sækja til sigurs í dag.

„Við stefnum á að búa til þannig umhverfi að við verðum klárir með okkar leikplan og getum í rauninni tekið þrjú stig. Svo verðum við að meta hvernig leikurinn er og ef eitt stig er niðurstaðan þá tökum við það. Við setjum leikinn þannig upp að við ætlum að láta þá snúa sér, hreyfa sig og koma þeimm aðeins á óvart. Þrjú stig er það sem við viljum,“ sagði Davíð Snorri, landsliðsþjálfari u-21 árs landsliðs Íslands í samtali við Vísi.