Eftir samspil og mark Guðjohnsen bræðranna Sveins Arons og Andra Lucasar í landsleik Íslands og Liechtenstein í undankeppni HM í gærkvöldi, hefur kastljós erlendra miðla einblínt á Guðjohnsen fjölskylduna.

Farsæll ferill föður þeirra er rifjaður upp en Eiður Smári Guðjohnsen lék meðal annars með Chelsea og Barcelona og vann til fjöldamargra titla, þar á meðal ensku úrvalsdeildina og Meistaradeild Evrópu.

The Sun segir að Guðjohnsen nafnið sé vel þekkt á Íslandi. Arnór Guðjohnsen, faðir Eiðs Smára, lék við góðan orðstír erlendis og hér heima.

„Fjölskyldan þarf ekki að hafa áhyggjur af því að arfleifð hennar deyji út nú þegar nokkur ár eru liðin síðan Eiður Smári lagði skóna á hilluna. Synir hans þrír eru allir farnir að láta til sín taka í knattspyrnuheiminum,“ segir í frétt The Sun um Guðjohnsen fjölskylduna.

Sveinn Aron, elsti sonur Eiðs Smára og Ragnhildar Sveinsdóttur, er samningsbundinn sænska liðinu Elfsborg um þessar mundir. Hann hefur reglulega verið hluti af íslenska karlalandsliðinu sem og yngri landsliðum Íslands. Hann er 23 ára.

Andri Lucas, næst elsti sonur þeirra er samningsbundinn Real Madrid og spilar um þessar mundir með varaliði félagsins, Castilla. Andri Lucas er alinn upp í hinni margfrægu La Masia akademíu Barcelona og hefur komið eins og stormsveipur inn í íslenska landsliðið hann hefur spilað 39 mínútur með A-landsliðinu og skorað tvö mörk. Andri Lucas er 19 ára.

Daníel Tristan er yngstur af þeim bræðrum. Hann hóf feril sinn með Barcelona á sama tíma og faðir hans spilaði fyrir félagið á árunum 2006-2009. Hann samdi síðar við Real Madrid og spilar nú með yngri liðum félagsins.

„Daniel Tristan er jafnvel talinn efnilegri en bræður sínir,“ segir í umsögn The Sun um Guðjohnsen bræðurna.