Breiðablik mætir spænska stórliðinu Real Madrid í riðlakeppni Meistaradeildar Evrópu á morgun. Leikið verður á Alfredo Di Stefano vellinum í Madríd.

Ásmundur Arnarsson, nýráðinn þjálfari Breiðabliks og Agla María Albertsdóttir, leikmaður liðsins, sátu fyrir svörum á blaðamannafundi í dag.

Langt ferðalag er að baki hjá Breiðablik en liðið flaug fyrst til Frakklands og millilenti áður en haldið var til Madrídar.

Þetta verður fyrsti leikur Breiðabliks undir stjórn Ásmundar. Hvernig finnst Ásmundi að taka við liðinu á þessari stundu?

„Það er óneitanlega sérstakt og að mörgu að huga. Þetta er jafnframt gríðarlega spennandi og virkilega gaman að koma inn í leikmannahópinn og Breiðablik sem klúbb.

Agla María segir það ekki hafa flækt hlutina að nýr þjálfari skildi hafa komið inn á þessum tímapunkti.

„Við visssum að það gæti komið inn nýr þjálfari og það hefur raunverulega engin áhrif á þessum tímapunkti,“ sagði Agla María, leikmaður Breiðabliks.

Breiðablik tapaði 2-0 á heimavelli gegn PSG í fyrstu umferð riðlakeppninnar en spilamennska liðsins var góð og draga má þá ályktun út frá svörum Öglu Maríu að sá leikur hafi gefið liðinu mikið.

„Leikurinn gaf okkur aðallega sjálfstraust. Við áttum okkur á því að við eigum raunhæfan séns í þessi lið. PSG leikurinn gaf okkur meira sjálfstraust,“ sagði Agla María.

Það hefur verið bras á Real Madrid, andstæðingum Breiðabliks á morgun en liðið hefur þó unnið tvo síðustu leiki sína. Ásmundi líst vel á verkefni morgundagsins.

„Við erum búin að skoða þær ágætlega og leikurinn leggst vel í okkur. Þetta er gott lið sem við erum að fara spila við,“ sagði Ásmundur Arnarsson, þjálfari Breiðabliks á blaðamannafundi í dag.

Leikur Real Madrid og Breiðabliks hefst klukkan 19:00 á morgun.