Vanda Sigurgeirsdóttir formaður KSÍ hefur sent ákall til stuðnignsfólk að fjölmenna á Laugardalsvöll í kvöld. Ísland mætir þá Liechtenstein í undankeppni HM.
Afar döpur mæting var á leik liðsins gegn Armeníu á föstudag en vonir standa til um að fleiri mæti á völlinn í kvöld.
Vanda skrifar pistil á vef KSÍ og segir. „Styðjum ungt landslið karla í knattspyrnu til dáða í leik á móti Liechtenstein í undankeppni HM á Laugardalsvelli í kvöld kl. 18.45.“
„A-landslið karla í knattspyrnu stendur frammi fyrir krefjandi verkefnum á miklum breytingatímum. Ég vonast til þess að sem flestir sjái sér fært að mæta á völlinn til að hvetja til dáða leikmenn Íslands, sem margir hverjir eru að stíga sín fyrstu skref með landsliðinu, og efla knattspyrnufólk sem keppir fyrir hönd þjóðarinnar.“
Vanda sem tók við starfinu fyrir rúmri viku síðan er á leið inn í sinn annan landsleik sem formaður.