Vanda Sigurgeirsdóttir formaður KSÍ var gagnrýnd fyrir að vera helst til of glöð á RÚV á föstudagskvöld. Var Vanda til umræðu í útvarpsþættinum Fótbolta.net á laugardag.

Vanda mætti á RÚV í þátt sem Gísli Marteinn Baldursson stýrir. Þátturinn fór í loftið skömmu eftir 1-1 jafntefli Íslands og Armeníu á Laugardalsvelli.

Um var að ræða fyrsta landsleikinn sem Vanda horfir á sem formaður og var hún kampakát með stigið. „Ég er taplaus formaður,“ sagði Vanda meðal annars.

Elvar Geir Magnússon stjórnandi þáttarins á X977 tók til máls og sagði. „Ég veit að Vikan með Gísla Marteini er skemmtiþáttur og gleðin að vopni og allt þannig, en Vanda formaður var alveg fullkát fyrir minn smekk með jafntefli gegn Armenum á heimavelli,“ sagði Elvar í útvarpsþættinum Fótbolta.net á laugardag.

Fyrrum ritstjóri Fótbolta.net og þjálfari Aftureldingar tók í sama streng. „Ég er alveg sammála því. Jöfnunarmarkið í lokin, það var eins og það hefði verið sigurmark í lokin miðað við stemninguna. Þá hefði ég alveg gefið þetta. En þetta var ekki þannig,“ sagði Magnús.

Vanda vonast eftir því að halda áfram að vera taplaus sem formaður en Ísland mætir Liechtenstein á heimavelli í kvöld.