Það vakti upp mikla undrun þegar að tilkynnt var um það að miðjumaðurinn Guðlaugur Victor Pálsson, hefði dregið sig út landsliðshópnum fyrir leikinn gegn Liechtenstein í undankeppni HM 2022 sem fram fer í kvöld.

Rætt var um málið í hlaðvarpsþættinum Dr.Football í dag og Hjörvar Hafliðason, umsjónarmaður þáttarins telur þetta mál eiga sér eðlilega skýringu.

„Ég veit að hann (Guðlaugur Victor) er búinn að vera í smá meiðslavandræðum á hné og hásin og missti úr síðustu leikjum hjá Schalke,“ sagði Hjörvar í hlaðvarpsþættinum Dr.Football.

Schalke á leik í þýsku 1. deildinni á föstudaginn gegn Hannover og það eflaust leikurinn sem Guðlaugur Victor er með í huga.

„Eðlilega er maður sem er ekki búinn að spila neitt ekki að fara spila föstudag, mánudag, föstudag. Hann verður bara að láta þá sem borga launin ganga fyrir væntanlega. Hann þarf ekkert að taka þátt í einhverjum ‘mikka mús’ leik á móti Liechtenstein. Við erum alltaf að fara vinna Liechtenstein,“ sagði Hjörvar í Dr. Football.

Albert Brynjar Ingason sem var gestur í þætti Hjörvars sagðist hafa heyrt af því að Guðlaugur væri hættur að leika með landsliðinu. Sú saga hefur heyrst ítrekað eftir að Guðlaugur yfirgaf landsliðið í gær.