Theodór Elmar Bjarnason þurfti að rifta samningi sínum við Akhisarspor í Tyrklandi fyrir áramót, hann átti fleiri mánuði inni í launum og nennti ekki að bíða lengur eftir að staðan lagaðist. Elmar hefur spilað í Tyrklandi síðustu ár en hann var lengi vel lykilmaður í íslenska landsliðinu.
Elmar hafði leikið með Akhisarspor í eitt og hálft ár en oftar en ekki var það til vandræða að fá greitt fyrir vinnu sína. „Ég rifti samningi mínum við Akhisarspor í desember og fór þá strax í það að finna mér nýtt lið,“ sagði Elmar í samtali við Morgunblaðið.
Elmar var ekki lengi að finna sér nýtt félag og hefur samið við Lamina í Grikklandi. Hann segir stöðuna í Tyrklandi hafa verið afar slæma.
„Akhisarspor er búið að vera í miklum fjárhagsvandræðum að undanförnu og það batnaði lítið þegar kórónuveirufaraldurinn skall á. Það er áhorfendabann í Tyrklandi sem hefur mikil áhrif á fjárhag félaganna og svo er það líka bara þannig í Tyrklandi að þeir gera ansi háa samninga,“ segir Elmar.
Elmar er búinn að setja málið inn til FIFA. „Ég er var með evrusamning við félagið og um leið og líran féll vegna faraldursins var í raun aldrei möguleiki fyrir þá að standa við þar til gerða samninga gagnvart mér,“ sagði Elmar við Morgunblaðið.