Það vakti talsverða athygli í Svíþjóð í gær þegar landsliðsframherjinn, Kolbeinn Sigþórsson samdi við Gautaborg þar í landi.
Kolbeinn rifti samningi sínum við AIK í Svíþjóð fyrir jól þegar ár var eftir af samningi hans. Tíðindin koma blaðamönnum í Svíþjóð nokkuð á óvart enda hafði ekkert heyrst af áhuga Gautaborgar, tíðindin koma því eins og þruma úr heiðskíru lofti.
Víðir Sigurðsson, blaðamaður Morgunblaðsins stingur niður penna í blað dagsins og ræðir þessi viðbrögð. „Viðbrögð í Svíþjóð við óvæntustu tíðindum vetrarins í fótboltanum þar í landi, samningi Kolbeins Sigþórssonar við gamla stórveldið Gautaborg, eru afar áhugaverð,“ skrifar Víðir í Morgunblað dagsins.
Flestir sem fylgjast með knattspyrnu eru meðvitaðir um meiðslasögu Kolbeins, honum hefur ekki tekist að ná sama takti í leik sinn og Íslendingar voru vanir að sjá, þrátt fyrir það var hann markahæsti leikmaður íslenska landsliðsins árið 2019.
„Hér á Íslandi var Kolbeinn einn vinsælasti leikmaður landsliðsins í aðdragandanum að EM 2016 og nánast í guðatölu eftir sigurmarkið gegn Englandi í þeirri keppni. Eftir margra ára þrautagöngu sem of langt mál væri að rekja hér væri óskandi að Kolbeini tækist að ná sér virkilega vel á strik með Gautaborg á komandi tímabili,“ skrifar Víðir.
Íþróttafréttamaðurinn Per Bohman sem starfar fyrir Aftonbladet birti í gær pistil um málefni Kolbeins sem vakið hefur mikla athygli.
„Þetta eru óvæntustu tíðindi vetrarins. Þess vegna sat ég stjarfur og horfði á myndband IFK Gautaborgar og áttaði mig ekki á því sem var að gerast, „skrifar Boham í pistli sem Mbl sagði fyrst frá.
Boham finnst sorglegt hvernig skrifað hefur veirð um Kolbein og frammistöðu hans í Svíþjóðar. Hann segir hins vegar að frammistaða hans hafi ekki verið góð. „Það er dálítið sorglegt að það skuli hafa verið skrifað svona neikvætt um Kolbein og spilamennsku hans í Svíþjóð. Þegar hreinn ruddaskapur er undanskilinn, hefur gagnrýnin á hann að mestu átt rétt á sér. Stjarna íslenska landsliðsins náði ekki að sýna sitt besta hjá AIK. Á tveimur árum var Kolbeinn aldrei nærri því formi sem hann og félagið gerði vonir um.“
Boham segir að þegar hann hafi talað við Kolbein, hafi honum liðið eins og íslenski framherjanum liði illa.
„Hann efaðist um sjálfan sig. Þegar við fréttamennirnir töluðum við hann eftir leiki var Íslendingurinn alltaf kurteis en augnaráðið og svipurinn gáfu til kynna að þarna væri á ferð einstaklingur sem liði mjög illa. Það er ekki auðvelt staða fyrir nokkurn mann. Ef þú veldur fólki vonbrigðum eða stendur ekki undir væntingum þá dregur það mikið úr sjálfstraustinu. Í hörðum og reiðum fótboltaheimi er enginn sem hjálpar þér.“
Tíðindin í gær glöddu Boham. „Þess vegna brosti ég breitt yfir þessum óvæntu fréttum. Ég hélt að við myndum aldrei aftur sjá Kolbein aftur á sænskum fótboltavelli. Það er eitthvað fallegt við það að þessi þrítugi leikmaður fái tækifæri til að sanna sig.“
