„Ég vil byrja á að þakka Jóni Þór og Ian Jeffs fyrir þeirra störf,“ sagði Guðni Bergsson um ráðningu KSÍ á Þorsteini Halldórssyni sem ráðinn var í dag landsliðsþjálfari kvenna til næstu tveggja ára.

Þorsteinn kemur til starfa eftir gott starf hjá Breiðabliki í Kópavogi. Hann tekur við af Jóni Þór Haukssyni sem lét af störfum á síðasta ári eftir trúnaðarbrest við leikmenn félagsins.

Guðni fagnar því að hafa klófest Þorstein en sambandið hafði skoðað kosti sína síðustu vikur. Þar á meðal var Elísabet Gunnarsdóttir sem vildi þjálfa liðið í hlutastarfi til að byrja með, fyrir því var ekki vilji hjá KSÍ.

„Hann er tvímælalaust einn af okkar bestu þjálfurum síðustu ára, hann hefur náð frábærum árangri með Breiðablik. Liðið vakti athygli á síðustu leiktíð fyrir sterkan varnar og sóknarleik. Við erum gríðarlega ánægð með að fá Þorstein inn,“ sagði Guðni.

„Við erum að byggja upp hörkulið, við erum að fara í riðlakeppni HM í haust. Verkefnin eru spennandi, við teljum að við séum búin að fá góðan og sterkan mann í brúna.“

KSÍ greiðir Breiðablik ekki bætur fyrir að taka Þorstein á þessum tímapunkti.

„Ég vil þakka Breiðabliki kærlega fyrir samskiptin, það var gott að vinna með þeim. Við náðum fínu samkomulagi um það hvenær Þorsteinn færi yfir á okkar launaskrá, það var gert í mjög góðu.“