Liverpool tók á móti Burnley í ensku úrvalsdeildinni í kvöld. Leikurinn endaði með óvæntum 1-0 sigri Burnley en leikið var á Anfield. Jóhann Berg var á meðal varamanna Burnley en kom inn á 65. mínútu leiksins.
Eina mark leiksins kom á 83. mínútu. Burnley fékk vítaspyrnu er Alisson, markvörður Liverpool, braut á Ashely Barnes, framherja Burnley, innan vítateigs.
Barnes tók sjálfur spyrnuna og skoraði eina mark leiksins og tryggði um leið Burnley mikilvæg þrjú stig.
Tap Liverpool þýðir að liðið situr enn í 4. sæti deildarinnar og mistókst að minnka forskot Manchester United sem situr á toppi deildarinnar. Liverpool er nú sex stigum á eftir Manchester United.
Sigurinn er mikilvægur fyrir Burnley sem fjarlægist fallsvæði deildarinnar. Liðið situr í 16. sæti deildarinnar með 19 stig, sjö stigum frá fallsæti.
Liverpool 0 – 1 Burnley
0-1 Ashley Barnes (´83, víti)
