Arnar Þór Viðarsson, nýr landsliðsþjálfari Íslands sat fyrir svörum hjá Hjörvari Hafliðasyni í Dr. Football í dag. Arnar ræðir um nýtt starf sitt og sínar hugmyndir.
Í upphafi þáttar gerir Arnar upp feril sinn sem leikmaður, hann var farsæll atvinnumaður og lék 52 landsleiki fyrir Íslands.
Hann segir umhverfið í kringum landsliðið á sínum tíma hafa verið þannig að atvinnumenn hafi verið að koma inn í áhugamannaumverfi. Menn hafi oftar en ekki slakað á þegar komið var í landsleiki.
„Það var þægilegt að koma heim, við komum heim og vildum auðvitað vinna og það var heiður að spila fyrir Ísland. Maður kom inn á Hótel Loftleiðir og það var hlaðborð í hverju hádegi, lambalæri og gos með. Lax í forrétt og kökur í eftirrétt, þetta hefur breyst að öllu leiti. Það er svo ekkert leyndarmál, sama staðan var í félagsliði líka. Það var farið á pöbbinn eftir leiki, það var eftir landsleiki líka,“ sagði Arnar Þór
Arnar segir að umhverfið í landsliðinu hafi ekki verið gott. „Við vorum komnir miklu lengra en umhverfið, það er erfitt að vera þjálfari með atvinnumönnum þegar þú þekkir ekki það umhverfi.“
Hjörvar rifjaði svo upp „eftirpartý“ eins og hann orðaði það sem var í Leifstöð árið 2001, Ísland vann þá sigur á Tékklandi á Laugardalsvelli og leikmenn fengu sér í glas að leik loknum. Fjórum dögum síðar var leikur við Norður-Írland og var haldið til Bretlands, degi síðar.
„Ég verð samt að taka það fram, þetta var á þeim tíma mjög stór sigur. Við vorum að fara að spila við Norður-Írland, þetta var eitt af fáum skiptum sem menn voru að fá sér á milli leikja. Svona mikið hefur umhverfið breyst, sem betur fer hefur þetta allt breyst. Þetta eru hlutir sem þróast, ef þú myndir reyna þetta í dag sem leikmaður. Þú myndir endast í tvö ár, fótboltinn hefur breyst svo mikið,“ sagði Arnar Þór.