David Alaba hefur náð samkomulagi við Real Madrid og mun ganga í raðir félagsins á frjálsri sölu í sumar. Alaba yfirgefur því FC Bayern eftir þrettán ár hjá félaginu.
Alaba mun skrifa undir fjögurra ára samning við Real Madrid á næstu dögum þegar hann hefur gengist undir læknisskoðun.
Draumur Alaba hefur verið að spila fyrir Real Madrid en hann hafnaði tilboðum frá Liverpool og PSG.
Alaba mun þéna 36 milljónir á viku eftir skatta og gjöld, það er talsverð launahækkun sem þessi öflugi varnarmaður hefur tryggt sér.
Hann er frá Austurríki en hann hefur unnið þýsku deildina níu sinnum og Meistaradeildina í tvígang með Bayern.
Alaba er einn besti varnarmaður í heimi en hann er 28 ára gamall, hann getur bæði leikið sem miðvörður og bakvörður.
