Gary Martin framherji ÍBV nýtur lífsins í Dubai þessa dagana en framherjinn er væntanlegur til lands á næstu vikum. Frá því að tímabilinu lauk hefur þessi enski framherji verið duglegur að ferðast um heiminn.
Gary hóf ferðalag sitt á því að fara til Tenerife í tvígang, í seinni ferð sinni greindist hann með COVID-19 veiruna og var í einangrun á Tenerife um langt skeið.
Framherjinn skellti sér svo til Maldíveyja og er nú loks mættur til Dubai þar sem hann æfir af miklum krafti ef marka má samfélagsmiðla hans.
Í dag var Martin í góðum félagskap á æfingu en hann og Stephan El Shaarawy leikmaður ítalska landsliðsins æfðu saman í hitanum. „Önnur æfing í bankann, það sem er erfitt fyrir mig er auðvelt fyrir El Shaarawy. Ég er á floti,“ skrifar Martin við mynd af þeim félögum.
El Shaarawy leikur í dag í Kína en áður hefur hann spilað með Roma, AC Milan og Monaco ásamt fleiri liðum. El Shaarawy er 28 ára gamall og hefur spilað 28 landsleiki fyrir Ítalíu.
Gary Martin fær aftur það verkefni að reyna að koma ÍBV upp í efstu deild en liðiðinu mistókst að endurheimta sæti sitt á síðasta ári.
