Carlos Tevez framherji Boca Juniors í Argentínu segir að faðir sinn eigi lítið eftir, heilsa hans hefur hrunið eftir harða og erfiða baráttu við COVID-19 veiruna.
Segundo Raimundo Tevez er fósturfaðir Tevez en gekk honum í föðurstað þegar faðir Tevez lést áður en hann fæddist. Hann er eiginmaður frænku Tevez og sá um að hjálpa við uppeldi hans.
Raimundo fékk COVID-19 veiruna síðasta sumar og var í 45 daga á gjörgæslu vegna þess, hann fékk að fara heim en skömmu síðar lagðist hann aftur inn á spítala.
„Þetta eru hrikalega erfiðir tímar fyrir mig og fjölskylduna, því miður á gamli maðurinn enga möguleika,“ sagði Tevez um stöðuna á föður sínum sem nú á lítið eftir.
„Ég hef unnið 29 titla á ferli mínum sem fótboltamaður en þetta er mér gríðarlega erfitt. Því miður á gamli karlinn enga von, ég sem faðir þarf að útskýra þetta fyrir dætrum mínum. Þetta er mjög erfið staða fyrir alla.“
Raimundo var með undirliggjandi sjúkdóma áður en hann fékk COVID-19, hann er nú á spítala en lífslíkur hans eru litlar.
Carlos Tevez hefur átt magnaðan feril sem knattspyrnumaður með Manchester United, Manchester City, landsliði Argentínu og fleiri liðum.