Jose Mourinho stjóri Tottenham er að missa alla þolinmæði á Gareth Bale kantmanni félagsins og héldu þeir krísufund á dögunum. Það sem verra er fyrir Tottenham er að ummæli af fundi þeirra hafa lekið út.
Bale er á láni hjá Tottenham frá Real Madrid, þrátt fyrir að Tottenham borgi aðeins helming launa Bale þá er hann launahæsti leikmaður félagsins. Bale þénar 650 þúsund pund á viku hjá Real Madrid en Tottenham borgar helming þeirra, 325 þúsund pund á viku. Kantmaðurinn hefur ekki sýnt neitt í endurkomu sinni í enska boltann.
Bale hefur heldur ekki fengið mörg tækifæri en hann var ónotaður varamaður gegn Sheffield United í gær. Fyrir leikinn höfðu Mourinho og Bale fundað.
Efni ef þeim fundi lak á netið eftir að Spurs TV birti myndband af æfingu liðsins. Þar er Mourinho að ræða við aðstoðarmenn sína um fundinn.
„Viltu vera hérna áfram eða fara til Real Madrid og ekki spila neinn fótbolta?,“ sagði Mourinho að hann hefði sagt við Bale á fundi þeirra.
Bale er á láni hjá Tottenham fram á næsta sumar en litlar sem engar líkur eru taldar á því að félagið festi kaup á honum. Samningur Bale við Real Madrid er til sumarsins 2022.
