Liverpool tekur á móti Manchester United í toppslag ensku úrvalsdeildarinnar á morgun. Leikið verður á Anfield og hefst leikurinn klukkan 16:30.
Manchester United er fyrir leikinn í 1. sæti deildarinnar með 36 stig. Liverpool situr í 2. sæti með 33 stig. Leikurinn er því mikilvægur fyrir bæði lið.
Liverpool fer inn í leikinn með meiðslavandræði sem eru að hrjá öftustu línu liðsins. Virgil Van Dijk og Joe Gomez, eru báðir frá vegna meiðsla og þá er Joel Matip í kapphlaupi við tímann til þess að ná leiknum.
Bakvörðurinn Kostantinos Tsimikas og Diogo Jota eru þá einnig frá vegna meiðsla sem þeir hlutu í desember. Þá er óvíst með þátttöku miðjumannsins Naby Keita, leikmaðurinn spilaði seinast í 7-0 sigri gegn Crystal Palaca þann 19. desember.
Hjá Manchester United er óvissa með þátttöku Nemanja Matic og Anthony Martial, en báðir hlutu högg í síðasta leik gegn Burnley. Matic náði að ljúka leik þrátt fyrir óþægindi en Anthony Martial þurfti að fara af velli og hélt utan um lærið er hann fór af velli.
„Martial á enn möguleika á því að geta spilað,“ sagði Solskjær á blaðamannafundi.
Óvissa er um það hvort Victor Lindelöf geti tekið þátt en hann glímir við óþægindi í baki. Þá eru engar líkur á því að Phil Jones taki þátt og Facundo Pellestri greindist með Covid-19 á dögunum.