Micah Richards, fyrrverandi leikmaður Manchester City og núverandi sérfræðingur á Sky Sports, segist finna til með Mesut Özil, sem virðist nú vera á leið frá Arsenal. Stuðningsmenn sjái aðeins brotabrot af þeim „hryllingi“ sem hann hefur þurft að upplifa.
Síðasti leikurinn sem Özil spilaði fyrir Arsenal var þann 7. mars árið 2020. Richards segist skilja þá sem segist ekki finna til með leikmanninum, hann hafi það gott með tæp 350.000 pund í vikulaun. Richards telur sig þó vita að þetta sé ekki auðveld reynsla fyrir Özil.
„Stuðningsmennirnir sjá ekki allar hliðar af þessu máli. Ég hef verið í svipaðri stöðu og Özil. Ég veit alveg nákvæmlega hvernig það er að vera settur í frystiklefann og fá ekki að spila. Þá telur fólk að maður halli sér bara aftur og taki við peningunum. Ég trúi því ekki að nokkur knattspyrnumaður myndi sætta sig við þannig stöðu,“ skrifar Richards í pistli í DailyMail.
Richards fer yfir feril sinn sem knattspyrnumaður í pistlinum og það hvernig hann var oftar en ekki skilinn eftir utan hóps og fékk ekki að spila.
„Að vera knattspyrnumaðurinn sem fær ekki að spila dregur úr manni. Hápunktur vikunnar hjá mér var oftar en ekki að fara á æfingasvæðið á laugardegi og spila tíu á móti tíu leik við ungu strákana,“ skrifar Richards.
Richards tekur síðan í kjölfarið til varna fyrir Mesut Özil sem hefur átt magnaðar frammistöður á sínum tíma hjá Arsenal.
„Að segja að hann hafi eytt síðastliðnu ári í það að safna að sér peningum er ósanngjarnt. Arsenal bauð honum þennan samning á sínum tíma, hann þvingaði félagið ekki í þennan pakka. Það er ekki hægt að kenna leikmönnum um það þegar félögin sníða samninginn,“ skrifaði Richards.
Hann segir að það sé nú klárlega kominn sá tímapunktur fyrir Özil að taka næsta skref á ferlinum sem verður líklegast hjá tyrkneska liðinu Fenerbache.
Hjá Arsenal hefur Özil spilað 254 leiki, skorað 44 mörk og gefið 77 stoðsendingar. Þá varð hann enskur bikarmeistari með liðinu í fjórgang.