Stíf fundarhöld verða hjá ensku úrvalsdeildinni í dag og á morgun en fundað verður með fyrirliðum, stjórum og lykil starfsfólki vegna COVID-19 ástandsins.
Ástæðan eru hertar reglur sem deildin hefur lagt til vegna veirunnar. Útgöngubann ríkir í Bretlandi vegna kórónuveirunnar en ástandið þar er slæmt, atvinnumenn í íþróttum fá hins vegar að halda áfram starfi sínu. Á dögunum setti enska úrvalsdeildin fram nýjar reglur og þar sem kom fram að leikmenn ættu ekki að fallast í faðma þegar mörkum væri fagnað.
Erfiðlega gengur fyrir leikmenn að skilja þessa einföldu reglu og mátti ítrekað sjá leikmenn faðmast um helgina í enska bikarnum og í ensku úrvalsdeildinni í vikunni.
Enska deildin vill ekki sjá leikmenn faðmast, gefa hvor öðrum fimmu eða takast í hendur. Deildin hefur áhyggjur af því að brot á þessum reglum verði til þess að fleiri COVID-19 smit verði í deildinni.
Fjöldi COVID-19 smita hefur verið í deildinni síðustu vikur og leikjum frestað ítrekað vegna hópsýkinga í liðum.
