Fylkir hefur komist að samkomulagi við Gróttu um félagaskipti Tinnu Brár Magnúsdóttur til Fylkis. Þá hefur Tinna Brá gert samkomulag við Fylki um að leika með félaginu næstu þrjú árin.
Tinna Brá, sem er uppalin hjá Gróttu, er fædd árið 2004 og hefur þrátt fyrir ungan aldur leikið alls 24 meistaraflokksleiki í deild og bikar með Gróttu, en hún hefur að auki leikið fyrir U15 og U17 ára lið Íslands.
Kjartan Stefánsson, þjálfari: „Við erum virkilega ánægð með að fá Tinnu Brá til liðs við okkur. Tinna er gríðarlega spennandi og efnilegur markvörður sem sýndi það með frammistöðu sinni síðasta sumar með Gróttu að hún er tilbúin í næsta skref og smellpassar inn í það metnaðarfulla umhverfi sem við viljum að sé í kringum Fylkisliðið. Við væntum mikils af henni á komandi árum og erum spennt fyrir framhaldinu.“