Tveimur leikjum lauk í kvöld í 18. umferð ensku úrvalsdeildarinnar. Manchester komst í toppsæti deildarinnar eftir sigur á Burnley. Þá vann Everton sterkan útisigur á Wolves.
Burnley tók á móti Manchester United á heimavelli sínum, Turf Moor. Jóhann Berg Guðmundsson, var í byrjunarliði Burnley og spilaði allan leikinn.
Eina mark leiksins kom á 71. mínútu. Það skoraði Paul Pogba eftir stoðsendingu frá Marcus Rashford. Skot Pogba hafði örlitla viðkomu í varnarmanni Burnley sem gerði það að verkum að Nick Pope, markvörður Burnley, kom engum vörnum við.
Fleiri mörk voru ekki skoruð í leiknum. Sigur Manchester United lyftir þeim upp í efsta sæti deildarinnar þar er liðið með 36 stig, þremur stigum meira en Liverpool sem situr í 2. sæti. Burnley situr í 16. sæti með 16 stig.
Burnley 0 – 1 Manchester United
0-1 Paul Pogba (’71)
Everton vann sterkan 2-1 útisigur gegn Wolves sem leitar logandi ljósi að sigri í ensku úrvalsdeildinni, síðasti sigur liðsins kom þann 15. desember síðastliðinn.
Gylfi Þór Sigurðsson, var í byrjunarliði Everton og lék 76 mínútur í kvöld.
Það var Alex Iwobi sem kom Everton yfir með marki á 6. mínútu leiksins eftir stoðsendingu frá bakverðinum Lucas Digne.
Á 14. mínútu jafnaði Rúben Neves hins vegar leikinn fyrir Wolves með marki eftir stoðsendingu frá Rayan Ait Nouri.
Þannig stóðu leikar allt þar til á 77. mínútu þegar að Michael Keane kom Everton yfir með marki eftir stoðsendingu frá André Gomes og tryggði liðinu um leið 2-1 sigur.
Everton kemst með sigrinum upp í 4. sæti deildarinnar þar sem liðið er með 32 stig. Stigasöfnun Wolves hefur ekki verið góð að undanförnu, liðið situr í 14. sæti deildarinnar með 22 stig.
Wolves 1 – 2 Everton
0-1 Alex Iwobi (‘6)
1-1 Rubén Neves (’14)
1-2 Michael Keane (’77)