Víkingur komst á topp deildarinnar með 2-1 sigri gegn KR en gríðarleg dramatík var undir lok leiks. Á sama tíma tapaði Breiðablik í Kaplakrika sem þýðir að Víkingur getur orðið Íslandsmeistari ef liðið vinnur næsta leik. Kári Árnason hafði þetta að segja við Stöð 2 Sport eftir leik.
„Þetta er bara eins og skrifað í skýin. Ég sagði fyrir leik að þetta minnti mig svolítið á stemninguna með landsliðinu þegar Króatía átti Finnland eftir og þetta er bara sama uppskrift en við eigum vissulega einn leik eftir og ætlum okkur sannarlega að klára það. Ég held að ég sé í banni þar og við þurfum að finna lausn á því. Ég treysti þessu liði fullkomlega til að klára þetta án mín,“ sagði Kári Árnason við Stöð 2 Sport eftir leik.
Gríðarleg dramatík var undir lok leiks en KR fékk víti í uppbótartíma sem Ingvar Jónsson varði. Þetta hafði Kári að segja um atvikið.
„Ég renn og reyni að henda hausnum í þetta og finn dynk á hnakkann en fer ekki með hendina í boltann. En þetta er bara það sem KR-ingarnir gera, þeir reyna að láta sig detta um allan völl og svo er bara öskrað. Það er vel þreytt að dómarar séu ennþá að falla í þess gryfju,“ sagði Kári Árnason við Stöð 2 Sport.
Aðspurður um hvaða handrit Víkingar væru eiginlega að fara eftir þetta tímabilið hafði Kári þetta að segja:
„Þetta er handrit sem við Sölvi erum búnir að vera að vinna að í nokkur ár,“ sagði Kári að lokum við Stöð 2 Sport.