Grindavík hefur ollið miklum vonbrigðum í Lengjudeild karla undanfarið. Liðið hefur nú ekki unnið í átta leikjum í röð. Nú er svo gott sem öll von úti um að keppa um sæti í efstu deild á næstu leiktíð.
,,Það eru búin að vera alvöru vonbrigði hjá Grindvíkingum undanfarið, búið að kosta miklu til þarna. Þeir eru ekki í einni einustu baráttu um að fara upp,“ sagði Kristján Óli Sigurðsson, sérfræðingur í Markaþætti Lengjudeildarinnar. Þátturinn var sýndur á Hringbraut í kvöld.
Kristján hélt áfram og benti til að mynda á að skarðið sem Gunnar Þorsteinsson skildi eftir sig kynni að hafa verið stærra en var haldið. Gunnar hélt til Bandaríkjanna í nám í vetur eftir að hafa verið fyrirliði Grindavíkur undanfarin ár.
,,Þetta er bara búið. Þeir sækja Dion Acoff, sem var Íslandsmeistari með Val. Frábær leikmaður þegar hann er heill en hann virðist bara aldrei vera heill. Þeir eru búnir að tjalda miklu til, með nokkra útlendinga. (Þeir) misstu náttúrulega fyrirliðann frá því í fyrra, Gunna Þorsteins. Það er kannski stærra skarð en menn halda.“
Grindavík er í sjöunda sæti Lengjudeildarinnar með 20 stig þegar sjö leikir eru eftir af mótinu. 12 stig eru upp í annað sætið, sem veitir þáttökurétt í Pepsi Max-deildinni. Það er því nokkuð ljóst að Grindvíkingar leika ekki þar á næsta ári.
,,Grindavík, það er krafan þar að vera í efstu deild en þeir eru svolítið frá því,“ sagði Kristján að lokum.
Hér fyrir neðan má sjá umræðuna um Grindavík, sem og Markaþátt Lengjudeildarinnar í heild sinni.
