Karlalið Vals reið ekki feitum hesti frá Evrópukeppnum þetta tímabilið. Mikael Nikulásson, sérfræðingur í hlaðvarpsþættinum The Mike Show, var alls ekki hrifinn af spilamennsku liðsins.
Valur tók fyrst þátt í 1. umferð forkeppni Meistaradeildar Evrópu. Þar fékk dróst liðið gegn ógnarsterku liði Dinamo Zagreb. Íslandsmeistararnir sóttu góð úrslit til Króatíu í fyrri leiknum. Honum lauk 3-2. Dinamo vann þó seinni leikinn á Hlíðarenda 0-2, þrátt fyrir fína spilamennsku Vals, og fóru áfram.
Valur fór því niður í Sambandsdeildina og hófu leik í 2. umferð þar. Þar voru andstæðingarnir Noregsmeistarar Bodo/Glimt. Valur tapaði báðum leikjunum í því einvígi 3-0, samanlagt 6-0.
,,Bodo/Glimt er gott lið en 6-0, ég ætla bara að segja það hreint út, það er bara hneisa. Valur er með dýrt lið. Flestir leikmenn í Val hafa spilað í atvinnumennsku, eða eru útlendingar, eiginlega bara allir. Það eru tveir landsliðsmenn,“ sagði Mikael í þættinum.
,,Þeir bara spiluðu hörmulega í fyrri leiknum. Ég sá tölfræðina úr leiknum áðan. Það kom mér náttúrulega ekkert á óvart. Þú færð ekkert meira heldur en þú átt skilið. 6-0 er bara glatað. Þeir eiga að tapa fyrir Bodo/Glimt en ekki 6-0.“
,,Þeir voru óheppnir með drátt og það var auðvitað vont líka að fá Dinamo Zagreb. Þeir voru mögulega þreyttari, að spila á móti mjög góðu liði þar. Þannig þetta var ekki alveg þeirra ár í Evrópu, Valsaranna. Tapa fjórum leikjum og eiginlega öllu sannfærandi en þeir ætla sér væntanlega að vera aftur þarna að ári og vonandi gera þeir betur þá.“