Marcus Rashford, sóknarmaður Manchester United og enska landsliðsins, er nú efstur á lista Sunday Times yfir þá Breta sem hafa gefið mest til góðgerðarmála miðað við fjárhag.
Þessi 23 ára gamli leikmaður hefur gefið 20 milljónir punda til góðra málefna. Það gerir tæpa 3,5 milljarða íslenskra króna.
Rashford hefur verið þekktur fyrir það undanfarin ár að nýta fjárhag sinn og frægð til þess að sjá til þess að fátæk börn á Englandi fái að borða. Sjálfur ólst hann upp við kröpp kjör.
Sumir hafa haldið því fram í gegnum tíðina að Rashford geri góðverk til þess að auka frægð sína fyrir eigin hagsmuni. Rashford var með skilaboð til þessa hóps á dögunum.
,,Af hverju þarf alltaf að vera einhver ástæða? Af hverjum getum við ekki bara gert hið rétta?“