Sölvi Snær Guðbjargarson er í klípu í Kópavogi eftir að hafa yfirgefið Stjörnuna í Garðabæ til að ganga í raðir Breiðabliks. Breiðablik keypti Sölva frá Stjörnunnni í maí og hefur hann fengið mjög fá tækifæri.
Sölvi er fæddur árið 2001 en hann var einn efnilegasti leikmaður Stjörnunnar, hann samdi við Breiðablik sem lagði ríka áherslu á að fá hann.
„Það virðist einn maður vera að fara í gegnum handónýtt fótboltasumar. Sölvi Snær Guðbjargarson, hann er fenginn í Breiðablik og svo átta Blikar sig á því að þetta er kannski ekki leikmaðurinn sem þeir héldu að þeir væru að fá, hann fær ekki mínútu í þessum leik gegn Leikni. Þetta ævintýri hans í Breiðablik er að breytast í sorgarsögu,“ sagði Hjörvar Hafliðason stjórnandi Dr. Football í þætti gærdagsins.
Hrafnkell Freyr Ágústsson segir að Sölvi sé ungur að hann þurfi bara að gefa sér tíma til að vinna sér sæti í sterku liði Blika. „Þetta byrjar illa, hann er fæddur árið 2001,“ sagði Hrafnkell.
Kristján Óli Sigurðsson fyrrum leikmaður Blika var gestur í þættinum var með ráð til Sölva. „Hann þarf að æfa meira og nýta tækifærið, ef manni var hent út úr liðinu þá fór maður að taka extra. Þegar þið fóruð á Oliver (Skemmtistaðinn) þá fór maður að drilla aukaspyrnur,“ sagði Kristján léttur.
Sölvi hefur fengið fá tækifæri og Hjörvar telur hann hafa gert mistök með því að fara í Breiðablik. „Það er 4 júlí og Sölvi er búinn að spila 70 mínútur af fótbolta, er hann ekki á aldri þar sem hann þarf að spila? Þetta voru megamistök að fara í Breiðablik,“ sagði Hjörvar.