Bold.dk telur að Freyr Alexandersson fyrrum aðstoðarþjálfari íslenska landsliðsins sé í viðræðum við Lyngby í dönsku 1. deildinni.
433.is sagi fyrst allra miðla frá því í morgun að Freyr væri í viðræðum við félag í næst efstu deild Danmerkur.
Bold.dk telur nánast öruggt að um sé að ræða Lyngby enda sé það eina félagið sem er þjálfaralaust í deildinni. Lyngby féll úr dönsku úrvalsdeildinni í vor og ræðir nú við Frey.
Freyr lét af störfum sem aðstoðarþjálfari Al-Arabi í maí þegar Heimir Hallgrímsson lét af störfum á sama tíma. Freyr hefur síðustu daga og vikur átt samtal við danska félagið en viðræður hafa þokast áfram og flaug Freyr út um helgina.
Kjaftasögur hafa verið á kreiki um að Freyr gæti komið til greina sem næsti þjálfari FH en litlar líkur eru á því. FH hefur aðeins náð í eitt stig í síðustu fimm leikjum og er pressa á Loga Ólafssyni þjálfara liðsins.
Það kemur í ljós á allra næstu dögum hvort Freyr taki við danska félaginu en fleiri félög hafa sýnt honum áhuga samkvæmt sömu heimildum.