Meðlimir hlaðvarpsþáttarins The Mike Show eru á því máli að of mikil ,,ungmennafélagsmenning“ ríki í íslenska boltanum. Nefna þeir sérstaklega HK í þessu samhengi.
Málið var rætt í þætti dagsins þar sem þeir Guðjón Þórðarson, Hugi Halldórsson og Mikael Nikulásson voru.
Guðjón, sem stýrði á árum áður íslenska landsliðinu og einnig Stoke og Barnsley á Englandi svo eitthvað sé nefnt, segir að mikilvægt sé að ná í fólk sem skarar fram úr og að rækta keppnisanda. Hann segir þó að þær skoðanir veki oft upp harða gagnrýni.
,,Óli Þórðar, vinur minn, myndi nú líklega kalla þetta aumingjaræktun. En það má ekki og ef að við stígum fast til jarðar sem viljum rækta keppnisandann og styrkja hann þá erum við karlrembur og gamlir, miðaldra, hvítir karlar sem að erum að stuðla að óeiningu í samfélaginu. Ég vil meina það að þegar við hættum að keppa og hættum að skara fram úr og þegar við hættum að leita að fólki sem að skarar fram úr, þá sígum við niður á við. Svo bara sökkvum við,“ sagði Guðjón í þættinum.
Guðjón kveðst einnig spenntur að sjá hvernig íslensk félagslið para sig saman við erlend félög í Evrópukeppnum í sumar. Þar verði hægt að sjá hvernig staðan er á liðunum hér heima.
Hann bætti svo aðeins við ræðu sína um keppnisandann. ,,Ef það á að sósíalesera þetta allt saman, það er upphafið að endalokunum.“
Smelltu hér til þess að hlusta á þátta dagsins hjá The Mike Show.