Jose Mourinho, fyrrum þjálfari Manchester United, telur að Dean Henderson sé tilbúinn að taka við af David de Gea sem aðal markmaður félagsins.
Henderson fékk tækifæri til að sýna sig þegar De Gea fékk frí til þess að fara til Spánar og vera viðstaddur fæðingu síns fyrsta barns. De Gea var aftur í byrjunarliðinu í úrslitaleik Evrópudeildarinnar þegar liðið tapaði gegn Villareal í vítaspyrnukeppni. Þar var De Gea skúrkurinn en hann varði ekkert víti og klúðraði sinni spyrnu.
Ole Gunnar Solskjaer þarf að taka ákvörðun um hver verður aðalmarkvörður tímabilið 2021-2022. Mourinho telur að það eigi að vera Henderson.
„Þetta eru góðir markmenn. Mér finnst þeir ekki vera stórkostlegir markmenn, en kannski má segja um Henderson að hann sé ekki ennþá orðinn stórkostlegur, hann gæti orðið það,“ sagði Mourinho við The Times.
„Ég hitti hann í Manchester þegar hann var strákur og ég man eftir því þegar hann bað um að fara á lán. Hann sagði
„þegar ég kem aftur þá ætla ég að verða aðalmarkvörður.“
Henderson skrifaði undir fimm ára samning við United síðasta sumar eftir að hann kom til baka frá Sheffield United eftir tveggja ára lán. De Gea á enn tvö ár eftir af samning en sögusagnir hafa verið um að hann vilji fara aftur til Spánar í sumar.