Jack Grealish, fyrirliði Aston Villa, hefur útskýrt af hverju hann hefur sokkana ávalt lágt niðri á meðan hann spilar.
Sokkar leikmannsins ná ekki upp fyrir kálfa í leikjum og hefur það vakið athugli síðustu ár. Hann segir það vera þar sem hann er hjátrúarfullur.
,,Auðvitað eiga sokkarnir að fara upp fyrir kálfana,“ sagði Grealish í viðtali. ,,Eitt árið þá minnkuðu sokkarnir mínir í þvottinum, þeir komust ekki hærra. Það ár spilaði ég mjög vel. Þetta er því hjátrú hjá mér. Ég ætla að halda þessu áfram því ég hef staðið mig vel,“ bætti hann við.
Fólk hefur stundum velt því fyrir sér hvort að Grealish sé yfirhöfuð með legghlífar. Það virðist vera lítið pláss fyrir þær. Hann setur þær þó vissulega á sig. Þær eru litlar, einhvers staðar á milli barna- og fullorðinsstærðar. ,,Það er líka hjátrú því ég hef gert þetta allt mitt líf,“ sagði Grealish um legghlífarnar.
Grealish hefur áður vakið athygli vegna hjátrúar. Árið 2019 fór hann upp úr ensku Championship-deildinni með Villa í handónýtum takkaskóm, þar sem hann hafði spilað vel í þeim áður.