HK tók á móti Fylki í Kórnum í kvöld. Árbæingar komust í góða stöðu en glutruðu á endanum niður tveggja marka forystu.
Djair Parfitt-Williams kom Fylki yfir strax á 5. mínútu leiksins með skoti í stöngina og inn. Það reyndist eina mark fyrri hálfleiks.
Hann tvöfaldaði svo forystu gestanna í upphafi seinni hálfleiks með sínu öðru marki. Stefan Alexander Ljubicic var þó ekki lengi að svara fyrir heimamenn. Hann náði frákastinu frá skoti sem að Ólafur Kristófer Helgason varði í marki Fylkis og kom boltanum í netið.
Það stefndi í fyrsta sigur Fylkis á tímabilinu þegar Ásgeir Marteinsson skoraði glæsilegt mark fyrir HK, beint úr aukapspyrnu, í uppbótartíma. Lokatölur 2-2.