„Það verður erfitt fyrir James Maddisson að hrista af sér ásakanir um að vera hrokafullur, það eru 18 mánuðir frá hans eina landsleik. Að brjóta COVID-19 reglurnar til að fara í partý er án nokkurs vafa síðasti naglinn í EM kistu hans,“ segir í fyrirsögn Daily Mail um stöðu James Maddisson miðjumanns Leicester.
Brendan Rodgers stjóri Leicester gómaði fjóra leikmenn sína í gleðskap fyrir rúmri viku, það var ástæða þess að fjórir leikmenn voru ekki í hóp liðsins í tapi gegn West Ham í gær.
James Maddison, Harvey Barnes og Hamza Choudhury skelltu sér allir í gleðskap heima hjá Ayoze Perez samherja sínum. Partýið var haldið þvert á allar reglur eftir tap gegn Manchester City á sunnudegi fyrir viku síðan.
Stjórinn fékk veður af því að leikmennirnir væru í gleðskap og sendi skilaboð á þá alla, hann sagði þeim að hætta þessu og skella sér heim á leið. Samkvæmt enskum blöðum urðu leikmennirnir hræddir við skilaboðin frá Rodgers, þeir slökktu öll ljós heima hjá Perez og földu sig. Helmingur gesta í gleðskapnum tók leigubíla heim til Choudhury sem býr fyrir utan Leicester.
Lögreglan mætti á heimili Perez sem er rétt hjá heimavelli Leicester rétt eftir miðnætti. Leikmennirnir voru settir úr hóp hjá Leicester í gær þegar liðið tapaði gegn West Ham.
Ensk blöð telja að Maddisson eigi ekki nokkurn möguleika á að komast í hóp Englands fyrir Evrópumótið í sumar, Gareth Southgate vilji sleppa því að taka menn sem eru umdeildir.