„Aðili á fjömiðlamarkaði sem Morgunblaðið ræddi við nefndi að innkoma Viaplay á íþróttaleikjamarkaðinn væri aðför að íslenskum íþróttastöðvum,“ þetta segir í frétt Morgunblaðsins í dag þar sem rætt er um þá staðreynd að streymisveitan Viaplay hafi tryggt sér réttinn á landsleikjum Íslands frá og með næsta ári og til ársins 2028.
Þegar íslenska landsliðið hefur leik í Þjóðadeildinni 2022 og í undankeppni EM 2024 geta íslenskir áhorfendur fylgst með öllu sem gerist á streymisveitunni Viaplay. Auk íslenska landsliðsins verður Viaplay heimili allra annarra landsleikja í Evrópu frá 2022-2028. Kaupin á sýningarrétti frá landsleikjum á vegum Knattspyrnusambands Evrópu koma í kjölfarið á kaupunum á sýningarrétti Meistaradeildar Evrópu, Evrópudeildinni og UEFA Conference League.
Ljóst er að streymisveitan hefur tekið verulega til sín af vinsælu íþróttaefni og yfir því kvarta sumir, þar á meðal Stefán Eiríksson útvarpsstjóri. „Þetta er umhugsunarvert, og ekki í takt við það sem fólkið í landinu vill. Landsleikir eru mjög vinsælt sjónvarpsefni sem til þessa hafa verið í opinni dagskrá, eða í það minnsta mjög vel aðgengilegir fyrir alla,“ segir Stefán við Morgunblaðið.
Hann segir RÚV ekki hafa haft efni á þessum pakka en Morgunblaðið segir að Viaplay borgi um 100 milljónir á ári fyrir pakkann. „Við höfðum hins vegar ekki fjárhagslega burði til að keppa við það sem var þarna á ferðinni.“
Það er UEFA sem sér um að selja réttinn af landsleikjum en með hærra verði fær KSí hærri upphæð í sinn vasa.