Didi Hamann. fyrrum miðjumaður Liverpool telur að Thiago Alcantara geri Liverpool að lélegra liði en það var fyrir. Spænski miðjumaðurinn gekk í raðir Liverpool síðasta haust frá FC Bayern.
Thiago er að komast í gang eftir erfiða byrjun og hefur tekið þátt í síðustu leikjum. Hamann segir að Thiago skemmi allt það góða sem Liverpool hefur byggt upp síðustu ár.
„Liverpool hefur um talsvert skeið verið mikið með boltann en þeir fundu alltaf leið til að brjóta upp varnir,“ sagði Hamann.
„Takturinn í liðinu mun breytast með Thiago þarna og ekki til betri vegar að mínu viti. Hann er bestur þegar lið heldur boltanum lengi, það er ekki það sem Liverpool hefur gert síðustu ár.“
„Thiago hægir á leiknum og spilar í raun ekki eins og Liverpool vill spila.“
„Liverpool hefur verið með duglega miðjumann, ekki eins hæfileikaríka og Thiago. En þegar þeir fá boltann þá senda þeir hann strax á Mane og Salah. Ef þú kemur boltanum fljótt út á þá, þá er mjög erfitt að stoppa þá.“