Þýska félagið Eintracht Frankfurt hefur fest kaup á Alexöndru Jóhannsdóttur frá Breiðabliki. Hún hefur þegar samið við félagið og er komin út til Þýskalands.
Alexandra kom til Breiðabliks frá Haukum haustið 2017. Hún hefur verið í algjöru lykilhlutverki með Blikum undanfarin ár og tekið gríðarlegum framförum. Alexandra varð Íslandsmeistari með Blikum árin 2018 og 2020 auk þess að verða Bikarmeistari 2018.
Alexandra hefur verið einn besti leikmaður Íslandsmótsins undanfarin ár og hefur unnið sér inn fast sæti í A-landsliðshóp Íslands þar sem hún hefur verið í byrjunarliðinu í undanförnum leikjum.
„Breiðablik er mjög stolt af því að Alexandra fái þetta stóra tækifæri og verður spennandi að fylgjast með henni í einni sterkustu deild heims. Eintracht Frankfurt er sögufrægt félag sem hefur unnið Þýsku Bundesliguna sjö sinnum auk þess að verða Bikarmeistarar níu sinnum. Þá hefur félagið fjórum sinnum orðið Evrópumeistari. Frankfurt er í 6.sæti í deildinni sem stendur og nokkur ár eru frá því að félagið vann síðast titil. Það er því spennandi áskorun framundan hjá Alexöndru,“ segir á vef Breiðabliks.