Ensku landsliðsmennirnir Phil Foden og Mason Greenwood voru í sambandi við fleiri hér á landi en stúlkurnar tvær sem komu á hótelið þeirra í gær. DV hefur fengið það staðfest frá stúlku sem var í sambandi við þá félaga um helgina.
Foden og Greenwood voru reknir úr enska landsliðinu í dag eftir að hafa fengið tvær íslenskar stúlkur á hótel sitt í gær. Um var að ræða brot á sóttvarnareglum sem gilda um íþróttalið. Leikmönnum er með öllu bannað að hitta aðra en eru með í ferðalaginu. Leikmennirnir komu báðir við sögu í 0-1 sigri Englands á Íslandi á laugardag.
Stúlkan sem um ræðir hefur birst í myndbandi sem stórar erlendar fjölmiðlar hafa nú birt. Ekki er um að ræða þær stúlkur sem fóru á Hótel Sögu í gær. Samkvæmt enskum blaðamanni sem DV ræddi við í dag leikur grunur á að Foden og Greenwood hafi komist í samskipti við stelpurnar í gegnum Tinder og þaðan hafi samskiptin farið yfir á Snapchat.
Meira:
Enskir landsliðsmenn brutu reglur hér á landi í gær – Fengu íslenskar stúlkur upp á hótel
Stúlkan sem blaðamaður DV ræddi við fullyrti að hún hefði ekki farið á hótelið til að hitta Foden og Greenwood en samskipti þeirra virðast vera frá því á laugardag. ,,Við vorum að fokkast í þeim. Ég fór ekki á hótelið, ég hef ekkert að segja,“ sagði stúlkan í samtali við blaðamann DV en hún var í samfloti með vinkonu sinni þegar samskiptin áttu sér stað.
Í þeim samskiptum sem DV hefur undir höndum er Phil Foden að tala við íslenska stelpuna í síma og sendir henni svo mynd af sér í gegnum Snapchat á hótelinu. ,,Hvað er planið? Við getum komið á hótelið, en ég veit ekki hvernig þið ætlið að lauma okkur inn,“ segir stúlkan í myndbandinu sem nú fer eins og eldur um sinu á Twitter.
,,Hvað ætlið þið að gera á hótelinu?,“ svarar Phil Foden. ,,Hvað heldur þú vinur?,“ segir stúlkan. Í öðru myndbandi sem DV hefur undir höndum er Foden að senda þessari sömu stúlku Snapchat skilaboð þar sem hann sést vel og greinilega.
Ljóst er að Foden og Greenwood voru með einbeittan brotavilja, þeir voru meðvitaðir um þær reglur sem eru í gildi.
