Brynjar Ingi Bjarnason framlengdi í dag samning sinn við Knattspyrnudeild KA og er hann nú samningsbundinn félaginu út sumarið 2023.

„Þetta eru gríðarlega góðar fréttir enda hefur Brynjar verið frábær í vörn KA í sumar og á svo sannarlega framtíðina fyrir sér,“ segir á heimasíðu KSÍ.

Samkvæmt heimildum 433.is höfðu lið á Höfuðborgarsvæðinu áhuga á að krækja í Brynjar og hafði Breiðablik meðal annars rætt við umboðsmann hans, Ólaf Garðarson.

Brynjar Ingi er 21 árs gamall og er uppalinn í KA. Hann hefur verið viðloðandi U-21 árs landslið Íslands undanfarin ár og leikið alla leiki KA í sumar, 16 í Pepsi Max deildinni og tvo í Mjólkurbikarnum og gert í þeim tvö mörk. Alls hefur hann leikið 32 meistaraflokksleiki fyrir KA en hann hefur einnig leikið 18 leiki með Magna og einn fyrir Einherja á láni.

Þá hefur Brynjar Ingi hlotið verðskuldaða athygli fyrir framgöngu sína í hjarta varnarinnar hjá KA í sumar og hafa erlend lið sýnt áhuga á kappanum.