Gylfi Þór Sigurðsson hefur byrjað á meðal varamanna í öllum þremur leikjum Everton í ensku úrvalsdeildinni það sem af er tímabili. James Rodríguez, Allan, André Gomes og Abdoulaye Doucouré virðast eins og staðan er allir á undan Gylfa í röð Carlo Ancelotti.
Gylfi hefur komið við sögu í öllum leikjum og byrjað tvo leiki í deildarbikarnum. Víðir Sigurðsson, einn fremsti íþróttablaðamður í sögu Íslands hefur ekki áhyggjur af stöðu Gylfa. „Eftir að hafa fylgst með Gylfa Þór Sigurðssyni í fyrstu leikjum Everton á nýbyrjuðu tímabili í enska fótboltanum hef ég ekki minnstu áhyggjur af framgangi hans í vetur,“ segir Víðir um stöðu Gylfa.
Gylfi er að hefja sitt fjórða tímabil hjá Everton og á tvö ár eftir af samningi sínum. „Hann hefur komið inná fyrstur varamanna liðsins í leikjunum til þessa og undantekningarlaust staðið sig prýðilega þann tíma sem hann hefur spilað. Inn á milli hefur hann síðan spilað leikina í deildabikarnum og verið þar fyrirliði liðsins,“ skrifar Víðir í Morgunblaðið í dag um stöðu Gylfa.
Víðir segist sjá mikinn mun á formi Gylfa þessa dagana. „Gylfi er augljóslega í mun betra formi en á síðasta tímabili, hann virkar helmingi léttari og minnir núna á sjálfan sig á bestu tímabilunum með Swansea og íslenska landsliðinu.“
Víðir telur að tækifæri Gylfa í deildinni í byrjunarliði komi fyrr en varir. „Það mun skila honum á ný inn í byrjunarliðið fyrr en varir,“ skrifar Víðir í Morgunblaðið.