Smátt og smátt er verið að hleypa áhorfendum aftur á knattspyrnuleikvanga í Evrópu, þrátt fyrir að kórónuveirufaraldurinn sé enn við líði. The Guardian hefur tekið saman hvernig staðan er í helstu deildum Evrópu.
Óljóst er hvenær áhorfendur verða aftur leyfðir á leikjum í Englandi. Áætlanir yfirvalda miðuðu við að mögulega yrði hægt að leyfa áhorfendur á leikjum í október. Önnur bylgja faraldursins er hins vegar komin af stað í Bretlandi og þess vegna verður ekkert af þeim áformum.
Í Frakklandi er liðum heimilt að hafa 1.000 áhorfendur á leikjum sínum. Það hafði verið ákveðið að leyfa 5.000 áhorfendur en aukning í Covid smitum varð til þess að sá fjöldi var lækkaður. Þó eru dæmi um það að félagsliðin sjálf banni áhorfendur, það er t.d. gert hjá Nice.
Í Þýskalandi var gefin út heimild nokkrum dögum fyrir upphaf tímabilsins. Heimildin fól í sér að félög í efstu deild mættu fylla í 20% sæta á leikvöngum sínum. Til að mynda voru 9.300 áhorfendur á leik Borussia Dortmund og Borussia Mönchengladbach um síðustu helgi.
Þó voru áhorfendur bannaðir á leik Bayern Munchen og Köln þar sem að smituðum fjölgaði ört á því svæði.
Á Ítalíu var liðum í efstu deild heimilt að hleypa 1.000 áhorfendum á sína leiki. Þá eru uppi áætlanir um að fjölga áhorfendum sem eru leyfðir á leikjum þar í landi. Hlutfallið 25% af heildarsætafjölda leikvanga hefur verið nefnt.
Ástandið er öllu verra á Spáni. Engir áhorfendur eru leyfðir á leikjum þar í landi og ekki eru uppi hugmyndir að leyfa áhorfendur í bráð.
Í gær fór fram leikur í Uefa Super Cup þar sem Bayern Munchen og Sevilla mættust á Puskas Arena í Ungverjalandi. Um það bil 15.000 áhorfendur voru á þeim leik.