A landslið kvenna mætti Svíþjóð á Laugardalsvelli á þriðjudagskvöld, í toppslag riðilsins í undankeppni EM 2022. Fyrir leikinn voru bæði lið með fullt hús stiga eftir fjóra leiki.

Sænska liðið, sem situr í 5. sæti á styrkleikalista FIFA, var sterkari aðilinn í fyrri hálfleik og náðu Svíar að skapa sér nokkur góð færi, en eina mark fyrri hálfleiks gerði Anna Avnegård á 33. mínútu og gestirnir komnir í forystu. Íslenska liðið náði að koma knettinum í sænska markið undir lok fyrri hálfleiks, en dæmt var sóknarbrot og því fékk markið ekki að standa, en stelpurnar okkar létu það ekki á sig fá og byrjuðu þær seinni hálfleikinn af miklum krafti.

Íslenska liðið var betra liðið á vellinum í seinni hálfleik, sótti stíft og uppskar jöfnunarmark á 62. mínútu. Sveindís Jane Jónsdóttir tók þá langt innkast sem rataði á Elínu Mettu Jensen sem skoraði með skalla á nærstöng

Að setja sér markmið er mikilvægt. Fyrir ári síðan setti þessi stelpa sér markmið í íþróttasálfræði í Flensborg. pic.twitter.com/xiJSWUnLgu

— Vilhjálmur Haralds (@vilhjalmurhrm) September 23, 2020

Karólína Lea Vilhjálmsdóttir tvítugur kantmaður Breiðabliks byrjaði sína fyrstu landsleiki í þessu verkefni, fyrst gegn Lettum síðustu helgi og svo gegn Svíum á þriðjudag. Hún var á skotskónum gegn Lettum en faðir hennar deildi því á samfélagsmiðlum í gær að þarna hefði draumur Karólínu verið að rætast.

Fyrir ári síðan setti Karólína markmið sitt niður á blað og þar stóð. „Ég ætla að spila A-landsleik í byrjunarliði eftir eitt ár,“ skrifaði Karólína í íþróttasálfræði í Flensborg.

Vilhjálmur Kári Haraldsson faðir hennar og farsæll þjálfari í yngri flokkum skrifaði „Að setja sér markmið er mikilvægt. Fyrir ári síðan setti þessi stelpa sér markmið í íþróttasálfræði í Flensborg.“