Stórleikur dagsins í ensku úrvalsdeildinni var án efa leikur Liverpool og Chelsea. Markalaust var í fyrri hálfleik þrátt fyrir einhverjar tilraunir hjá báðum liðum. Liverpool hélt boltanum aðeins betur í fyrri hálfleiknum en Chelsea náði þó nokkuð góðum tökum á leikin undir lok fyrri hálfleiks. Rétt áður en flautað var til hálfleiks náði þó Sadio Mané að skjótast einn í gegn en var tekinn niður af danska varnarmanninum Andreas Christensen. Dómarinn gaf Christensen gult spjald fyrir brotið en eftir nánari skoðun með VAR-tækninni ákvað hann að gefa honum það rauða.
Í seinni hálfleik náði Sadio Mané að koma Liverpool yfir. Það gerði hann á 50. mínútu eftir stoðsendingu frá Roberto Firmino. Fjórum mínútum síðar náði Mané að skora annað mark eftir skelfileg mistök markmanns Chelsea, Kepa Arrizabalaga. Chelsea fékk tækifæri til að minnka muninn á 75. mínútu þegar liðið fékk víti en Jorginho klúðraði vítinu og var lokaniðustaðan 0-2 sigur Liverpool.
Thiago Alcantara kom inn sem varamaður í hálfleik, frumraun hans í enska boltanum og hann kom vel inn í leik Liverpool. Hann sendi 82 sendingar, næst flestar sendingar allra í leiknum. Tómas Þór Þórðarson ritstjóri enska boltans á Símanum ávarpaði Thiago sem Samgönguráðherrann. Það er nýtt viðurnefni á Thiago sem stjórnar öllu á miðsvæðinu.
„Æðislegur, æðislegt að fá þennan leikmann í þessa deild. Í þetta gæðalið, guð hjálpi hinum liðunum þegar hann kemst á skrið og hættir að gefa vítaspyrnur,“ sagði Margrét Lára Viðarsdóttir á Símanum í gær.
Freyr Alexandersson var með Margréti í að greina leikinn og hafði ,,Það að senda 82 sendingar á 45 mínútum og lang flestir fram á við, hann er að reyna sendingar sem misheppnast sem er bara vegna þess að samherjar hans eiga eftir að átta sig á því að hann getur sent sendingar sem aðrir geta ekki. það er enginn knattspyrnumaður í heiminum jafn kynþokkafullur með boltann og Thiago,“ sagði Freyr um Thiago en umræðuna má sjá hér að neðan.
Kynþokkafulli Samgönguráðherrann fékk mikið lof frá Margréti Láru og @freyrale í Vellinum í gærkvöldi. pic.twitter.com/sdnChUP2Rh
— Síminn (@siminn) September 21, 2020