Fjölnir er eina liðið í deildinni sem hefur ekki ennþá sigrað leik á tímabilinu. Fjölnismenn vonuðust eflaust eftir sigri gegn KA-mönnum í dag þar sem Akureyringarnir eru frekar nálægt þeim í töflunni. Þær vonir efldust þegar rúmlega hálftími var liðinn af leiknum en þá fékk Fjölnir víti eftir að Mikkel Qvist, leikmaður KA, braut af sér í teignum. Qwist fékk beintt rautt spjald og léku KA-menn því einum færri það sem eftir var af leiknum. Jon Strom fór á punktinn, skoraði og kom Fjölni yfir. KA-menn náðu ekki að svara í fyrri hálfleik og var staðan því 1-0 fyrir heimamönnum í hálfleik.
Í seinni hálfleik náði KA-maðurinn Ásgeir Sigurgeirsson að jafna metin fyrir Akureyringana en það gerði hann á 76. mínútu eftir stoðsendingu frá Hrannari Birni Steingrímssyni. Fleiri mörk voru ekki skoruð í leiknum og endaði hann því með 1-1 jafntefli. Fjölnir náðu því ekki að kreista fram fyrsta sigur tímabilsins í þessum leik.
