Knattspyrnusamband Íslands hefur ákveðið að allir leikir í öllum flokkum og aðrir viðburðir á vegum KSÍ muni fara fram án áhorfenda. Er þetta gert að beiðni Almannavarna um að íþróttahreyfingin sýni frumkvæði varðandi sóttvarnir en afskaplega mikill fjöldi nýrra smita greindist í gær. Þetta kemur fram í tilkynningu á vefsíðu sambandsins.

„Þetta endurspeglir bara þá stöðu sem við erum í í samfélaginu,“ segir Guðni Bergsson, formaður KSÍ í samtali við DV. „Það er auðvitað bakslag að smitin hafi gosið svona upp og segja má að við séum að berjast við vírusinn aftur fyrst að seinni bylgjan er komin svona mikið af stað. Við verðum bara að takast á við það saman og kveða þetta í kútinn.“

Eins og áður segir er þetta gert eftir beiðni frá Almannavörnum og segir Guðni að sambandið hafi auðvitað samþykkt að gangast við því. „Við vorum auðvitað tilbúin að gera það. Það er mikilvægt að hjálpast að í þessu og við gerum það sem við getum til að hjálpa,“ segir Guðni.

Í tilkynningu KSÍ segir að þessi ákvörðun nái til leikja sem hefjast eftir kl. 14:00 í dag, laugardaginn 19. september, áhorfendur eru því leyfðir á leikjum sem hefjast kl. 14:00.  „Staðan verður endurmetin á mánudagsmorgunn í samráði við yfirvöld og framhaldið ákveðið og tilkynnt eins fljótt og mögulegt verður,“ segir í tilkynningunni.