Arsenal er búið að selja Emiliano Martinez markvörð sinn til Aston Villa. Arsenal mun kaupa Rúnar Alex Rúnarsson til að fylla hans skarð.
Martinez er 28 ára gamall markvörður frá Argentínu sem spilaði stórt hlutverk á síðustu leiktíð. Arsenal veðjar hins vegar á Bernd Leno og sökum þess vildi Martinez fara.
Martinez hefur verið í herbúðum Arsenal í tíu ár en hann var í sex skipti lánaður burt frá félaginu. Villa borgar 20 milljónir punda fyrir hann.
Arsenal mun svo kaupa Rúnar Alex á 1,5 milljón punda en íslenski markvörðurinn mun skrifa undir fimm ára samning. Ensk blöð telja að Rúnar Alex gæti þreytt frumraun sína með Arsenal strax í næstu viku þegar Arsenal mætir Leicester í enska deildarbikarnum. Algengt er að varamarkvörður og menn sem spila minna byrji leiki í deildarbikarnum.
Árið 2014 fór Rúnar til danska liðsins Nordsjælland frá KR en þá var hann aðeins 18 ára gamall. Árið 2018 fór Rúnar frá danska liðinu og yfir til Frakklands í Dijon.