Guðmann Þórisson hefur verið eins og kóngur í ríki sínu í hjarta varnarinnar hjá FH síðustu vikur. Þessi öflugi miðvörður virðist vera að finna sitt gamla form.

Síðustu ára hafa reynst Guðmanni erfið, meiðsli hafa sett strik í reikning hans en í sumar hefur hann að mestu verið heill heilsu. Umræða um Guðmann spratt upp á Stöð2 Sport í gær.

„Hann fékk skammt af gagnrýni um daginn þegar hann lét reka sig út af eins og smákrakki uppi í Grafarvogi. En síðan þá, og ég veit að hann var skammaður eins og smákrakki í kjölfarið, hefur hann litið miklu betur út,“ sagði Guðmundur Benediktsson í Pepsi Max stúkunni í gær.

Guðmann fékk að líta rauða spjaldið seint í leiknum og virðist hafa verið tekinn á teppið vegna þess. Hjörvar Hafliðason, sérfræðingur þáttarins telur sig vita af hverju Guðmann er í sínu besta formi.

„Svo er hann á samningsári. Hann er laus eftir árið. Ég gæti verið í allt kvöld að tala um leikmenn sem eiga gott ár þegar þeir eru að vera samningslausir. Ég held að Guðmann sé gott dæmi um það. Hann er að ýta FH-ingum í að semja við sig,“ sagði Hjörvar á Stöð2 Sport.