Ásgeir Marteinsson kom HK yfir á 23. mínútu og fjórum mínútum síðar náði Ólafur Örn Eyjólfsson að skora annað mark fyrir Kópavogsliðið. Lars Marcus Johansson náði að minnka muninn skömmu síðar og fjórum mínútum eftir það náði Stefán Teitur Þórðarson að jafna metin fyrir Skagamenn. Liðin voru jöfn í hálfleik en í þeim seinni náði Jón Arnar Barðdal að koma HK aftur yfir. Fleiri mörk voru ekki skoruð og endaði leikurinn því með 3-2 sigri HK-manna.
Á Hlíðarenda var markalaust í hálfleik en á 53. mínútu náði Aron Bjarnason að koma Valsmönnum yfir. Staðan hélst 1-0 fyrir heimamönnum allt fram á síðustu mínúturnar en þá náði Sigurður Egill Lárusson að tryggja sigur Valsara með marki eftir stoðsendingu frá Kaj Leo Bartalsstovu. Lokaniðurstaðan því 2-0 fyrir Val sem situr á toppi deildarinnar með 31 stig, 7 stigum meira en Stjarnan sem er í öðru sæti en Stjarnan á þó einn leik til góða.