Carlo Ancelotti, þjálfari Everton, hefur verið duglegur á leikmannamarkaðnum í sumar. Hann keypti tvo miðjumenn sem taka nokkurn veginn við stöðunni hans Gylfa og því byrjaði okkar maður á bekknum í dag. Staðan var markalaus í hálfleik en þegar 10 mínútur voru liðnar af seinni hálfleik náði Dominic Calvert-Lewin að koma Everton yfir. Gylfi kom inn á af bekknum á 68. mínútu. Hvorugt liðanna náði að skora eftir fyrsta markið og endaði leikurinn því með 0-1 sigri Everton.
Einnig var markalaust í fyrri hálfleik hjá West Bromwich Albion og Leicester. Timothy Castagne náði að koma Leicester yfir snemma í seinni hálfleik og Jamie Vardy skoraði annað mark Leicester þegar um korter var eftir af leiknum. Á 83. mínútu fékk Leicester víti og fór Vardy á punktinn og skoraði þriðja og síðasta mark leiksins. Lokaniðurstaðan því 0-3 sigur Leicester.