Hólmbert Aron Friðjónsson mun að öllu óbreyttu ganga í raðir Brescia á Ítalíu. Þetta herma mjög öruggar heimildir 433.is.
Brescia reynir að ná samkomulagi við Álasund um að kaupa Hólmbert af norska félaginu. Samningur Hólmberts við Álasund í Noregi rennur út í lok árs. Samkvæmt heimildum 433.is vonast allir aðilar til að klára málið á næstu dögum.
Hólmbert er 27 ára gamall sóknarmaður en hann gekk í raðir Álasunds árið 2018. Hann hefur skorað 11 mörk á þessu tímabili í norsku úrvalsdeildinni, hann er næst markahæsti leikmaður deildarinnar.
Samkvæmt heimildum 433.is hefur fjöldi liða haft samband við Álasund síðustu vikur og reynt að kaupa Hólmbert, þar má nefna lið í Tyrklandi og Rússlandi.
Hólmbert hélt ungur að árum til Celtic í Skotlandi og fór þaðan til Bröndby í Danmörku. Hann lék svo með KR og Stjörnunni hér á landi áður en hann hélt aftur út árið 2018.
Framherjinn stóri og stæðilegi var í leikmannahópi Íslands gegn Belgíu og Englandi. Hólmbert fiskaði vítaspyrnuna sem Birkir Bjarnason brenndi af gegn Englandi en nú verða þeir liðsfélagar á Ítalíu. Birkir gekk í raðir Brescia í janúar en liðið féll úr Seriu A á síðustu leiktíð.
Hólmbert skoraði svo eina mark Íslands í 5-1 tapi gegn Belgíu á þriðjudag. Keppni í Seriu B hefst í lok mánaðarins en líkur eru á að Hólmbert gangi í raðir félagsins fyrir þann tíma.
Sögufrægir leikmenn hafa komið við sögu hjá Brescia en má þar nefna Roberto Baggio og Pep Guardiola. Mario Balotelli er svo í herbúðum félagsins í dag. Brescia hefur í fjórgang unnið Seriu B.