Flestir lykilmenn Íslands mæta ekki til leiks þegar liðið mætir Englandi og Belgíu í Þjóðadeildinni. Jóhann Berg Guðmundsson, Alfreð Finnbogason, Gylfi Þór Sigurðsson og Aron Einar Gunnarsson mæta ekki til leiks. Ástæður þeirra eru misjafnar en Jóhann Berg og Alfreð hafa verið meiðslum hrjáðir síðustu ár. Þá er Ragnar Sigurðsson meiddur þessa stundina.

Liðið leikur gegn Englandi á laugardag en það verður hausverkur fyrir Erik Hamren þjálfara liðsins að velja byrjunarlið sitt.

Tómas Ingi Tómasson sérfræðingur hjá Stöð2 Sport skilur ekki nokkra hluti í vali Hamren. Eitt af því sem Tómas Ingi áttar sig ekki á er sú staðreynd að Emil Hallfreðsson og Jón Guðni Fjóluson séu valdir í hópinn, báðir eru án félags.

„Það er flott að aðrir fái tækifæri. Þetta eru akkúrat leikirnir sem á að prufa menn í. Það er flott að þessir fái frí og mæti ferskir í leikinn sem skiptir máli fyrir okkur. En það hefði verið gaman að sjá menn í staðinn fyrir þá sem eru félagslausir. Það að vera félagslaus og valinn í landslið, aftur og aftur er þetta ekki orðið fínt?“ sagði Tómas Ingi á Stöð2 Sport í gær.

Tómas Ingi skilur ekki hvers vegna efnilegasti leikmaður Íslands i dag, Ísak Bergmann Jóhannesson er ekki í hópnum en hann er í U21 árs landsliðinu.

„Bæði Emil og Jón Guðni eru flottir spilarar en hefði ekki mátt velja þennan,“ sagði Tómas Ingi en Vísir.is fjallar ítarlega um.