Umræðan hefst með því að Snæbjörn spyr hvort það eigi að loka landinu aftur vegna COVID-19. „Ég vil bara loka börum og skemmtistöðum,“ segir Heiðar þá. Hann segir ástæðuna fyrir því vera sú að þar er fólk fullt og óábyrgt.
Heiðar tekur dæmi um ástandið í Bandaríkjunum en þar hefur kórónuveiran verið hvað skæðust. „Hvað er að gerast í Ameríku? Það eru þessi fullu ungmenni, þau eru alls staðar. Það eru allir að tala um þetta, loka þessum börum,“ segir hann.
„Unga fólkið, það er í sleik og það er inni á háværum skemmtistöðum að reyna að tala saman upp í eyrun og munninn á hvort öðru og eru frussandi á hvort annað. Þetta er þeim að kenna, djömmurunum er um að kenna.“
Snæbjörn segist draga það í efa að það sé gott að loka börum. „Ég held að mögulega dragi það bara úr klamydíusmitum og COVID-smitum að hafa barina opna,“ segir hann og bendir á að aukning var á kynsjúkdómum í fyrri bylgju faraldursins í vor.
„Það sem ég er að spá í er það hvort það séu ekki barirnir sem eru vandamálið, heldur íþróttamótin,“ segir Snæbjörn síðan. „Út af því að öll smitin eru eiginlega að koma frá íþróttafólki. Önnur bylgjan byrjaði þegar ung fótboltakona kom til landsins og smitaði alla í liðinu sínu og smitaði í útskriftaveislunni.“
Heiðar bendir honum á að það hafi reyndar enginn smitast vegna stelpunnar í gegnum fótbolta. Ekkert smit kom upp í liðinu hennar og heldur ekki hjá andstæðingunum.
„Þetta íþróttafólk er að fara í svo mikið af útskriftarveislum og svona,“ segir Snæbjörn næst og heldur áfram. „Þetta er svo mikið afreksfólk að það er alltaf að óska öðrum til hamingju með eitthvað og mæta á eitthvað. Fyllibytturnar halda sér bara heima eða fara á barinn, þau eru ekkert að dreifa sínum sýklum út um allt. En íþróttafólk fer allan hringinnn, það fer á Akureyri, það fer til Vestmannaeyja, það fer alls staðar út um allt.“
Sigurbjörn nefnir einnig að það hafi verið smit á ReyCup. Heiðar bendir honum á að það hafi bara eitt smit verið á ReyCup. „Þessi stelpa sem kom frá Bandaríkjunum, hún smitaði fólk á fylleríi. Hún smitaði ekki fólk á fótboltaæfingu, hún smitaði ekki fólk þegar hún var að spila fótbolta,“ segir Heiðar. „Það smitaðist enginn.“